Rais Magufuli na Ziara ya siku tano mkoani Tanga iliyoanza Agosti 3.

Rais Magufuli leo ameanza ziara ya kikazi ya siku tano mkoani Tanga,akiwa huko amesema Serikali imeanza kuchukua hatua dhidi ya watu waliouziwa mashamba makubwa Mkoani Tanga na kuyatelekeza ambapo mpaka sasa hati miliki 5 za ardhi zenye zaidi ya ekari 14,000 zimefutwa na utaratibu unaendelea ili kuwagawia wananchi na wawekezaji watakaokuwa tayari kuyaendeleza kama ilivyokusudiwa.

Pia Rais Magufuli ameagiza shamba la ekari 50 lililopo katika kijiji cha Kabuku ambalo lililotolewa na wananchi kwa Jeshi la Kujenga Taifa “JKT” kwa lengo la kujenga kiwanda miaka 7 iliyopita, lirudishwe kwa wananchi na ameitaka “JKT” ijenge kiwanda hicho katika eneo lake jingine lenye ukubwa wa zaidi ya ekari 9,000.

Aidha, Rais Magufuli ametoa siku 15 kufanyika kwa uchunguzi wa fedha Tsh. Milioni 500 zilizotolewa kwa ajili ya ujenzi wa majengo ya kituo cha afya cha Mkata, kufuatia kuwepo kwa taarifa za ufujaji wa fedha hizo na kuongeza kuwa Serikali itapeleka Tsh. Milioni 800 kwa ajili ya kuendeleza kituo hicho baada ya hatua stahiki kuchukuliwa.