Taifa Stars bado Mambo Magumu dhidi ya Amavubi.

Mambo yamekua magumu kwa "Taifa Stars" kwani imeshindwa kupata ushindi kwenye mechi yake ya kwanza ya kufuzu fainali za Afrika kwa wachezaji wa ndani (CHAN) itakayofanyika Kenya mwaka 2018.Stars ilitanguliwa kufungwa goli la mapema dakika ya 17 kipindi cha kwanza na Dominique Nshuti. 

Himid Mao Mkami akaisawazishia Stars kwa mkwaju wa penati kunako dakika ya 34, kufuatia beki wa Rwanda kuushika mpira kwenye penati box wakati akiwa kwenye harakati za kuokoa hatari golini kwao.

Kocha wa Stars Salum Mayanga alilazimika kufanya mabadiliko kadhaa baada ya beki wake wa kulia Shomari Kapombe kushindwa kuendelea na mchezo baada ya kuumia,hivyo “Boniface Maganga” aliingia kuchukua nafasi ya Kapombe.

Aidha pia kocha Mayanga alimpumzisha John Bocco na nafasi yake ikachukuliwa na Stamili Mbonde.Baada ya matokeo haya Stars inatarajia kurudiana tena na Rwanda Julai 23, 2017 katika mchezo ambao utaamua ni timu gani itasonga mbele hatua inayofuata.